كنوز ضاد العرب :: يا سوسنة /بقلم عدنان ضباشنه /مصر
كنوز ضاد العرب /شعر حديث
يا سوسنة
الشاعر محمد ضباشه
ما تحنى لحظة يا سوسنة
فى قلب كان طارح هنا
سافر يعافر فى المدى
يترجى حل المسألة
وتحن شمسك للشروق
على حلم تايه على المدار
ريقه يشتاق للندى
نتفة عمار
فى بؤرة الليل الحزين
الطوق مسلسل اليدين
والخطوة ضلت من العينين
سرسب دموعها فى سكتك
تسهر فى حضن الوريد
الشوق يزيد
والنار تقيد
تعزف بغربة غنوتك
على لحن يجافى البراح
عفقة نواح
سكة فلاح
تشرق فى قلبه بسمتك
ولا تطل عتمتك
مرسومه عنوان النهار
تحجب الأمل البعيد
تشتاق لعيد
ما يكون بوار
يشد على الوتر حيلك
على حبه يغنى لك
وفى للى تاه كيلك
ولحضنه كونى ممكنة
ما تجور عليه الأزمنة
والأمكنة
يا سوسنة فكى جيد الإنتظار
ماتقسمينا ليل نهار
صحى حيطان الدار
ترجع تونس وحدتك
شدى موج المستحيل
طهريه من قال وقيل
إنصبى جناحك ميزان
للى أفسد واللى خان
واللى باعك واللى كان
سارق من قوتنا الأمان
لما تاه العدل منه
قلبى دمع غصب عنه
وأما ليله شق ننه
وأما حقه مات وهان
زمى فينا كل أه
داوى الجرح اللى طال
للى خانوا قولى لا
واللى زرعوا فى الضلال
واللى فتحوا بطن يومك
واللى شقوا حياء هدومك
فابعدينا عن كلابك
اللى جيبنا ماشين وراه
تعليقات
إرسال تعليق